اهداء لكل بنت

يابنت أمانه لا يغرك شياطين
حذراك لا يغرك كلام الذيابه
يقول أحبك وأعشقك موت تدرين
أموت بك ياشوق شوق الكتابه
ويقص لك قصة حياة المحبين
يقول أحبك وأنتظر منك أجابه
ويفرش لك الورد الحمر والبساتين
ويعطيك من حلو الكلام بذرابه
والله يخسي ولد الردى لا تصدقين
ملعون خايب يخزن السم نابه
تكفين ثم تكفين يابنت تكفين
لا تدنسين أسمك ومنهو وفابه
أخوك لامنه قعد بالدواوين
يقعد وراسه فوق فوق السحابه
يابنت والله سمعتك فوق الأثنين
سمعتك من سمعة عرب لك قرابه
سمعتك ثم سمعتك تسوى ملايين
ثم سمعتك ثم سمعتك والمهابه
وإن قال أحبك أفهمي وش تردين
قولي المحبه بالردى لي معابه
وقولي له أهلي بالملاقى سلاطين
ودرب الدنس ياورع محدن مشابه
هذا كلامي وقولي اللي تقولين
اللي يبيك يدل بيتك وبابه
والخاتمه يابنت طعم العسل زين
بس البلى اليا دنسته الذبابه!!